要數香港最多仇家嘅部門，相信非審計署莫屬。大陸雖然冇審計署，但多得一眾網民申張公義！中石油集團日前爆出「豪車門」，俾內地網民踢爆，佢哋喺新疆用嘅係德國百萬豪華越野車。
「新疆地形複雜」
事件曝光，但中石油冇悔意之餘，仲賴地硬，話用靚車係有必要，因為新疆地形複雜，用架性能好嘅車，係為咗配合當地特殊地理環境，而且部車折舊咗之後唔使20萬人仔，完全冇違反有關規定。
唔講尤是可，一講火都嚟，中石油嘅解釋惹嚟網民猛烈抨擊，有網民將今次「豪車門」同中石化早前嘅「天價酒」拉埋一齊講，覺得央企每年賺咁多，仲攞咁多國家補貼，實在唔合理，強烈要求發改委介入，查吓佢哋一年飲幾多茅台、買幾多部靚車，畀人民一個交代。