賭王何鴻燊賀壽搞到變幾房大鬥法，賭王更病倒入住養和。四太梁安琪昨日否認外傳賭王因感染肺炎鏈球菌入院，解釋只是賭王冷親又勞累，笑言要攬實賭王讓他取暖，更透露明天四房的壽宴，賭王都希望舉行。
賭王何鴻燊明日90歲生日，但賭王去完頭炮、二房搞的生日晚宴就病倒入院，三房周一的百萬生日派對被迫移師到醫院舉行，而昨日有傳賭王其實是感染肺炎鏈球菌。
「恢復得幾好」
四太梁安琪昨日中午到醫院探賭王，並否認賭王患肺炎：「作出嚟嘅，何生都係疲勞，嗰日（二房生日宴）人多，有細菌。唔知點解有咁嘅報道，未聽過（肺炎），醫生話何生有啲攰、冷親，同埋可能同食嘢有關。」
問四太可要送條頸巾給賭王保暖？她笑說：「唔使，我攬住佢咪得囉！」明日是賭王生日，四房原定為賭王賀壽，四太續說：「佢恢復得幾好，佢都想搞，但想諗一諗先，始終咁多人，出院嘅事要睇醫生決定。」二房超瓊、猷龍等都有到醫院探賭王，但沒接受訪問。
超雲感受父愛
超蓮和猷啟昨到醫院時買了兩打蛋撻慰勞記者，而超雲下午在微博上載了和賭王、三太的合照，並寫道：「今天爸爸精神漸漸好轉。」而超雲前晚在微博說取消生日會，卻有另一番體會：「感受到的不是爸爸為大局的着想，而是對我們的真愛，擔心他的子女開心與否。」
另外，鄧紫棋（G.E.M.）近日被發現與超蓮是好友，她昨出席活動時說：「我哋年紀同性格相近，間中會互相去大家屋企傾偈，講吓少女心事。」
採訪：梁錦雯、譚倩宜
攝影：陳慧安、陳俊強