曼城自從油王班主嚟咗之後，球場內外都係大花筒，洗腳唔抹腳。搞到上星期五公佈業績自爆蝕咗1.975億鎊（約24億港元），不過有咁大條水喉射住，蝕都冇所謂；而且油王要威，一定要喺唔同嘅領域做到最潮、最蠱惑、最多、最激心，實行要霸住尖端嘅位置！
周一曼城練波時，有幾個球員戴咗樣家唔會喺球場上見到嘅嘢。仲記唔記得前兩季啲球星好鍾意戴嘅頸箍呢？冇錯，雖然頸箍已經唔潮，亦被國際足協禁止喺比賽時用，不過就型在每個曼城球員都有自己嘅專屬頸箍，上面繡咗球員名嘅縮寫、球衣號碼同國旗。一個頸箍都可以個人化，睇嚟曼城又搵到條新財路。而上次怒炒曼聯嘅時候，巴洛迪利入波之後囂爆show「WHYALWAYSME?」tee，曼城唔夠兩日就係官網發售，動作快到咁，仲唔係最潮？
球場贊助左手交右手
曼城今年7月同伊蒂哈德航空簽咗10年贊助合約，個贊助包括球場冠名同裝備上面印「伊航」字樣，總值成4億鎊。不過，伊航話事人係曼城班主同父異母兄弟，歐洲足協話咁做蠱惑兼唔公平，要詳細調查喎！今次贊助確係左手交右手，不過，一家人有錢一齊搵，又可以幫兄弟公司做埋廣告，曼城的確好巴閉。
曼城今季大大話已經有7次贏對手3球以上，可以話係英超炒人最多嘅球隊。不過最勁個次都係要數番10月尾，喺同市死敵曼聯個場炒人6:1，差啲平到人哋塵封咗85年嘅紀錄；所以真係抵佢哋家排第一。不過，曼城兩個叛徒，可以話係最激心，一個泰維斯，搞到曼市滿城風雨，家寧願喺阿根廷打golf，都唔返曼城，激到領隊文仙尼生蝦咁跳。而另一個「叛徒」艾迪巴約，喺曼城除咗對阿仙奴之外，吓吓揸流攤。點知家喺熱刺好似識飛咁，成爭標要角；文仙尼見到，個心一定嗱住嗱住。曼城一係唔做，一做就要做到最盡、最前，唔係尖端係咩？