英超今季好睇過戲，打咗三分一左右，頭7已經開始帶離，後面嘅真係見燈尾都當你贏嗰隻！今日唔講摯愛，講吓另外一隊倫敦波。
呢個幾星期，成日俾精通古今中外足球嘅「視而不見大大」狂寸！冇錯，季前波亞斯空降車路士，係威係勢，而我係有講過對波亞斯有啲期望，覺得佢掂；又冇錯，佢家咁嘅戰績係車迷都唔會收貨，不過咁，呢刻係咪就要話佢唔得呢？有冇諗過車仔本身問題喺邊忽呢？
車仔最大鑊後防唔掂
除咗球員老化，車仔最大鑊就係個忽忽，即係後防，今季我晨早貼英超波，都話過今年防線係唔掂，場場都要失吓波先安落！泰利跣腳唔講喇，最慘係波亞斯冇咩水源班兵，上年水貨廢托唔關佢事，而佢為咗活化番車仔嘅中前場，買咗桑馬達返嚟呢吓我本人好欣賞，不過可能隊波已經使大咗，搞到忽視咗後欄，仲以為keep住嗰條防線仲work，早知今日，仲買唔買盧卡古？34歲仔，要佢一步登天，你講就易，大家打工仔，心照啦！仲有，去到季中轉會窗重開，睇阿巴個勢都唔會畀佢點大手入貨，不過好好醜醜都要執番靚條防線，唔係老列納真係寸到飛天都似！
波亞斯你咪再掛住玩陀飛輪喇，上年喺波圖望吓隻靚錶睇吓幾時攞冠軍，我唔想你今年喺度倒數自己幾時收皮囉。
好喇，英超冠亞軍我都係冇轉章，都係曼市雙雄包Q㗎喇，第3？呢刻我都仲對藍戰士有信心嘅。
文：守丹