亞視今日將公佈喺15位候選港澳區亞姐中篩剩8強，跟內地的12位精英喺下月底搞嘅大中華區決賽再分高下，佳麗呢排都準備就緒，爭取曝光搶入圍。
繼47歲高齡Old嬋8號施熙瑜被爆犯眾憎，台前幕後對佢神憎鬼厭外，噚日網上流傳現年39歲、司馬燕表妹3號陳麗文嘅攬佬照。
陳麗文前日參加亞姐嘅才藝表演，佢着住魚網絲襪大跳拉丁舞，踢腳晒pat露股惑，奪得季軍，同時佢又攞咗iPhoneApp投票出嚟嘅「最想親親佳麗」同「最Sweet佳麗」，三獎在手信心大增。陳麗文不愧最Sweet佳麗同最想親親佳麗，原來佢冧仔有一手，網上近日流出佢俾貌似陳浩民的一名西裝友從後熊抱嘅照片，西裝浩民隻手剛好觸及陳麗文胸部。
向舊愛示威
據知男方名叫Garlon，任職銀行高層，係一名失婚漢，跟前妻育有兩名小朋友，陳麗文去年經表姐司馬燕介紹認識，佢哋拍咗拖半年就散咗，有指陳麗文嫌Garlon同前妻藕斷絲連。失戀嘅陳麗文就叠埋心水參選亞姐，諗住向舊愛示威。由於表姐司馬燕關係，陳麗文同好多圈中人稔熟，佢仲試過喺派對撞到Laughing哥謝天華，陳麗文當然黐住合照。
亞視經常爆人手荒，旗下監製HoratioTsoi喺facebook留言炮轟：「開show前兩日先有PA畀，家做監製就做埋導演、PA、編劇嘅嘢，係咪畀四份人工我？」大爆亞視違反香港免費電視牌照維持可確保電視台正常運作人手數量嘅守則。