今年三色台嘅視帝競爭激烈，「籮靚仔」同「卧底爛仔」嘅形勢可謂叮噹馬頭，卧底爛仔恨攞視帝恨到出面，鬼咁積極為自己造勢，相反籮靚仔開緊劇，都唔得閒做呢啲動作。
通常喺頒獎禮前都特別多傳聞，就算籮靚仔已經成為民意視帝，都傳出佢要以約換獎；但查實籮靚仔今年因一套內地劇而喺內地爆紅，身家倍升，唔少內地製作單位都爭住搵佢拍劇，籮靚仔話晒年紀唔細，佢不知幾想趁勢返內地賺人仔，而且關仁知佢同三色台嘅約所剩年期唔長，佢又點會再加長張約綁死自己？如果話頒個獎畀佢而要加長張約，相信籮靚仔情願唔要獎囉。
撰文：關仁