個個為iPhone着迷，連帶周邊產品都賣個滿堂紅。不過好奇怪，機殼同Cable固之然成行成市，就連駁iPhone嘅迷你Hi-Fi，都有唔少選擇，偏偏iPhone重點功能之一嘅《FaceTime》，就好似無乜正嘅產品去Support。Imate就剛推出一款iDocking機座，擺部iPhone落去，再做一個簡單接駁，就即時變成一個時尚電話座，個Slot位仲專登預得鬆動啲，令所有iPhone都擺得落，最重要係iDocking有齊黑白兩色，Fit晒iPhone嘅顏色。
講咗咁耐，到底iDocking有乜實際功用？最主要係機座設置一個音質不俗嘅擴音喇叭，接聽來電大可垂低雙手、坐得舒舒服服咁慢慢傾。擺放iPhone嘅位，仲可調校唔同角度，令大家玩起《FaceTime》、《Skype》等視像通話時，避開頭頂燈光嘅反光弊病，傾得自然更舒泰，最重要係設有個實體聽筒，無咗條長長嘅電話線，就算同女友、親人煲足幾粒鐘視像電話，都唔怕輻射入腦啦！接駁上亦好簡單，下方隱藏位插電源線，而聽筒就以35mm頭駁番落部iPhone度，安裝上非常容易，真係阿媽都識搞。
查詢：i-Smart（24170002）