真實從來比虛構奇特，許多發生在生活的啱啱遇着剛剛，要是一字不漏搬進劇本，必定被不信邪的觀眾柴台，投訴抄襲真人真事的編劇老作，呃神騙鬼妙想天開──最擅長安排奇情的，原來既不是艾慕杜華也不是陳韻文，而是我們在天上的父。同理，寫得最好的對白並非舞台和銀幕聽到那些，而是報紙雜誌的有聞必錄，田納西威廉斯絞盡腦汁望塵莫及，甚至王爾德也甘拜下風。假如你以為我指的是娛樂版，就大錯特錯了：明星訪問流露的戲劇王后氣質通常太重，加上分分鐘不忘推銷自己，入肉度遠不及新聞版的非職業演員犀利。
譬如早幾日登上頭條的退休練馬師，金句層出不窮，教人五體投地。被問及遭檢控賄選心情如何，答案並非千篇一律的「呢啲嘢，我會以平常心對待」，而是「濕濕碎啦，又唔係殺人放火」；霸佔公地揚到街知巷聞，宣稱「塊地用咗咁耐，已經係我嘅私人土地」；同樣就把太太蒙在鼓裏的課外活動發表高見，不但不像唐先生那樣將風流韻事貶作缺失，還為忐忑的師奶大派定心丸：「男人係會內疚嘅，佢真係愛你嘅話，去完滾，返屋企會更聽你話！」邏輯自成一格，道理青紅皂白不分，編劇班導師不拿來做教材訓練學生簡直嘥料。
意大利前總理的淫語錄也很精彩，會見娶了意女的薩科齊，笑言「我條女讓咗畀閣下」，提起官邸多Ｐ派對醜聞，戲稱「新鮮出爐民意調查顯示，意國三成女性樂於同我搞嘢，其餘七成芳心暗喜答：『唔係啩，仲想梅開二度？』」縱觀當今電影圈，類似對白沒有一個人寫得出。