上周六英超中段賽事，有曼城大戰紐卡素等多場戲碼都唔算弱嘅波，不過我求大俠就鍾情韋根主場對布力般流浪嘅護級大戰，最後踢成3:3，一啲都冇令捧場客失望。除咗出現蠱惑角球外，布力般門將羅賓遜，補時去到6分鐘唔要命咁博到12碼，簡直就係用鮮血幫球隊攞番1分。
韋根由古沙特88分鐘建功，以3:2領先布力般，以為終於可以取得英超第2場勝仗，點知補時去到6分幾鐘；球證隨時吹完場時，布力般獲得角球，連門將羅賓遜都棄關上前助攻。結果輾轉之下，羅賓遜頭槌攻門之際，韋根中場大衛鍾斯一腳踢上去，好一個羅賓遜，捨命陪君子咁前額被踢中，登時頭破血流；好彩都有回報，球證判罰12碼，耶高保不負眾望射入，戲劇性逼和3:3。32歲嘅羅賓遜以前踢熱刺同英格蘭國家隊，都周不時犯錯，今次賠埋條老命為布力般，領隊卻恩當然大讚：「佢簡直就係英雄，我唔知1分最後對球隊有冇幫助，但對士氣就一定有好大鼓舞。」
韋根被逼和3:3包尾
布力般攞1分，唔單止靠勇氣，仲要靠蠱惑；凱列特59分鐘頭槌幫布力般追成2:2嗰球，其實都有古講。當時布力般有角球，耶高保扮開波，但鏡頭所見似乎踢唔到個波，摩頓柏達臣行埋去，粒聲唔出推波入禁區；韋根守衞唔為意有此一着，陣腳一亂，被摩頓柏達臣傳中，凱列特門前頂入。其實曼聯之前都試過用呢招，但畀球證吹番轉頭要再開過，今次球證走漏眼，就益咗布力般嘞。
韋根同布力般各得1分，對護級冇咩幫助，分別以6分及7分排包尾同尾二，真係攬住一齊死；奇怪布力般水深火熱，領隊卻恩日日俾球迷示威要佢下台，球會管理層竟然加佢薪，年薪去到150萬鎊（約1,800萬港元），布力般印度班主做法又會咁似香港特首，林公公民望越低，反而越升官發財！
伍健：旁證有責
對於布力般流浪追成2:2那球由摩頓柏達臣自編自演，個人在角球旗連推兩腳後，傳交隊友射入，前國際足協球證、現任傑志總領隊嘅伍健（小圖）噚日回應：「按照球例，開出角球後，同一個球員唔能夠連續踢兩腳，如果球證察覺，肯定會吹犯規，之後要重踢。今次球證冇判罰，可能佢睇唔到過程先出現問題。」伍健仲補充：「如果球證容許比賽繼續，即過程中，球證同助理球證都誤以為有攻方球員踢過個波，所以判入球有效。」
