上星期華華提到天香樓老闆韓桐椿仙遊，享年九十，係笑喪。講到天香樓，不能不提大閘蟹，但就唔係好多人知，喺天香樓對面，其實有家賣大閘蟹嘅利羣公司，同天香樓韓老闆好有關係。
利羣「隱藏」喺尖沙嘴柯士甸路天香樓對面嘅嘉華大廈入面，相信只有老街坊先知門路。唔講唔知，韓老闆有位公子叫韓維良，利羣就係韓維良創辦。
華華記得，1997年時曾經有機會同韓公子傾過兩句，當時佢同華華講，利羣係五豐行其中一大經銷商，批發嚟自安徽、江西、湖北同江蘇四地嘅大閘蟹，當年經利羣出售嘅蟹約500至600噸。韓老闆同佢位公子，可以講得上係大閘蟹零售批發父子兵。不過，華華聽聞，韓公子已經移咗民好一段日子，家陣利羣由韓老闆嘅徒弟繼續經營。