唐牛放假去銅鑼灣行街街，見到利信達（738）開始清貨大減價，即刻諗番佢哋之前話有倉底貨60萬對；有戰友報料，話灣仔開埋Outlet㖭！睇番中期業績，原來存貨周轉日數高達210天，即係一對鞋平均要等7個月先賣得出，難怪要犧牲毛利，割價酬賓。存貨多嘅仲有潮人品牌I.T（999），周轉日數177天，潮流呢家嘢，變得快過范太選特首嘅態度，舊貨想賣得出，惟有大割引囉。
除咗存貨問題，土炮零售股另一個死穴，就係成本高企，好似莎莎（178）咁，中期毛利率收窄至44%，罪魁禍首之一，就係租金同埋員工成本大增26%，以總額計，已經佔去年度六成，未來只會有增無減。包浩斯（483）上星期五仲發埋盈警，原因係經營成本增加，講到尾咪又係貴租累事囉。Joyce（647）同埋威高（1173）嚟緊就會公佈業績，股價仲竟然偷步炒高，有貨在手嘅戰友，知道點做啦！
唐牛