A股上周五再插2%，港元6個月同12個月拆息急升，人民幣滙價下跌，資金抽緊絕對唔係好兆頭。內銀臨近年尾要趕數，狂吸存款叫停貸款，香港資金抽緊係正常不過，呢個因素年尾前都會拖累港股。
但睇番恒指技術走勢，9小時RSI底背馳，即使係9月大跌市，恒指每次見到呢個訊號，9小時RSI都要反彈上去60以上至再跌。家好多利淡消息浮晒面，同8月初歐債危機突如其來惡化時有頗大分別，照計個市都似沿住9月Pattern咁跌居多，即係先有至少幾百點超賣反彈，彈完先散。夠膽博反彈的話，上周五出現陽燭嘅股份勝算應較大，但最緊要快，但求有一成半成回報就好鬆人，如果見市升先嚟追，到時就輪到大戶高位派貨畀你。
近期要搵值得Hold嘅股選擇好少，但唔係冇。城市電訊（1137）啱啱出業績，截至8月底全年純利升45%至3.14億元，股息率7.3厘，PE10倍。
經濟唔好，對佢影響唔大，喺2003年度大家認為經濟最低迷嘅時，佢嘅盈利升至2.58億元；到05、06年度係經濟回春時，佢就連蝕兩年，原因係IDD業務式微，城電轉攻寬頻，龐大投資令佢資本利息開支大增。
寬頻收成補貼電視業
家城電寬頻固網業務已經進入收成期，嚟緊會投資免費電視，成敗未卜，但同05、06年唔同嘅係，當年IDD式微但固網未跟上，令盈利出現兩年斷層。今時今日，城電寬頻業務都仲未見頂回落，雖然PCCW出動陳豪搶攻師奶客，但城電競爭力猶在，相信至少未來一兩年，寬頻仍可補貼新投資。
睇番上次熊市，要出現恐慌性拋售時，城電股價先識跌，分別係牛三完結嘅11月同金融海嘯期間，其餘都唔跌，證明大家都當佢係避難所。
由8月初到10月初，城電股價由4.40元跌至3.50元，之後回穩，3個月內打造圓底，冇理由只係炒業績上一棍就收皮，應該有下文。近幾日股價回復平靜，上周五更出現陰燭，晉佳估佢只跌一棍就企穩，穩陣計等跌定先買，之後應有力突破業績高位4.38元，短線Set4元買入，睇4.50元。至於中線持有最好分段買，跌穿3.50元要鬆人。
晉佳
本欄逢周一、三及五刊出