樂壇天后楊千嬅出名投資有道，聽聞佢周六去咗睇跑馬地豪宅紀雲峰，唔知係咪想買多層樓投資。
呢位天后級人馬，早兩年先賣咗赤柱富豪海灣間無敵海景獨立屋，賺成三千幾萬，跟住即刻分散投資，先後買入大埔康樂園同薄扶林貝沙灣。跑馬地向來係名星聚腳點，唔通天后對嗰區特別有feel，去睇吓有冇筍貨？除咗楊千嬅，劉嘉玲同王菲就去咗睇香港仔深灣9號。
馬榮成密密睇豪宅
近排新樓盤星光處處，漫畫天王馬榮成亦不斷睇樓，早排睇完深灣9號，跟手又去睇九龍傳統豪宅區嘅逸瓏，噚日中午又孭住個背囊去咗睇新地（016）喺上水嘅天巒，唔知係唔係想買番一間半間投資。