上次提到「偏心」這個題目，自認偏心的老細大有人在，以下就是兩個例子：
地產界龍頭大姐大說：「話我偏心？我一日時間就係得咁多，手下千幾人，點分都分唔勻。況且我呢行耐不耐就會自然淘汰，個個『愛將』都要幫先至生存到，我幫得幾多個？幾時都係物競天擇，適者生存。」
大姐大又說，做地產不用天才，不過一定要有奮進心，肯捱肯搏，「生意低潮，喊晒走嚟問我點算嘅，我直情叫佢返屋企慢慢盡情喊。肯敲門問我不如試吓唔同方法，即使計仔全部行唔通，我都會花心機解釋畀佢知，順便過佢兩招。咁叫做偏心？我教人一定揀放工後，留低與否全屬自願性質，就係要睇吓邊個真係有心學。趕時間約咗人去街？唔阻你，請便！」
獵頭公司老闆同樣自認偏心，「講起上司偏心愛才，其實我係典型得益者。初出道我就平步青雲，我話頭醒尾，積極主動，唔怕蝕底，有嘢做永遠第一個舉手。唔明就問，做錯就認，就算唔服氣，老闆鬧一樣企定定，只會下定決心永遠唔會再出錯，以後唔再俾人鬧。所以我係上司之寶，不過好乞同事憎，成日話老細偏心。」
今天他已做了別人的上司，並「繼承」偏心的作風，他說：「我最憎左一句我唔知，右一句唔關我事。以為讀多兩年書就好架勢，諸多事實，滿嘴歪理仲死唔肯認錯，仲要將責任推畀其他人。讀書多唔多叻唔叻唔係問題，只要聽教肯捱，我當然加多兩錢肉緊。於是就俾人背後話我偏心，只錫擦鞋仔。」
張慧敏（COREsearchLtd）
mailto:[email protected]