林保怡、陳豪同佘詩曼合演嘅無綫劇集《天與地》，擺足兩年今晚終於推出，噚日一班演員喺中環宣傳，一直冇現身嘅阿佘終於出現，眾人祝酒時喺酒上點火，點知陳豪隻杯爆咗跌落地，好彩冇受傷。已離世嘅陳鴻烈都有份演出，金燕玲睇番佢嘅片段時忍唔住眼濕濕。
陳豪競視帝預齋坐
阿佘呢幾日先返香港，前日仲同媽咪慶祝60歲大壽，咁啱前日無綫台慶，阿佘今年冇出席會唔會失落？佢話：「咁又冇，係唔慣冇咁忙。」而下月5號係無綫頒獎禮，阿佘憑《花花世界花家姐》提名視后，但佢話冇期出席，反而第二日梁靖琪嘅婚禮會現身，問佢怕唔怕無綫嬲？阿佘話：「婚禮個期一早定咗，TVB係大機構唔會小器。」有傳內定係胡杏兒攞視后，阿佘話唔信。至於無綫斟阿佘同保怡拍《金枝慾孽2》，佢哋異口同聲話撞期，除非無綫肯延期先有機會拍。
另外有傳謝天華會得視帝，仲由吳鎮宇頒獎，有份角逐嘅陳豪話：「我冇聽過，我坐冷板凳都咁多年，冇乜所謂，我只求有另類劇拍，唔好只拍師奶劇。」
