近年澳門大賽車新增路車挑戰賽，採用無限量改裝街車，除吸引一批日籍職業車手參加外，亦為本地車手造就踏足專業賽車舞台的快捷階梯，利用平日於街道常見的歐日辣車作賽，車迷的投入感大增。吸收去年因壞車退出的慘痛經歷，TRC車隊首席車手鄧智倫，今年揸部500匹三菱EVO8代火併各地好手，結果雖不能奪冠，但完成10圈賽事算有交代。
文：沈啟泰
攝影：陳盛臣
Profile
姓名：鄧智倫
年齡：36歲
2000年首次接觸賽車
2010年HKAA路車挑戰賽冠軍
港車手爭口氣
有留意本地賽車消息的車迷，對今日的主角James並不陌生，從中國賽車場Trackday第一搞手，到近年轉戰東南亞各大小汽車飄移賽事，都不難找到他的蹤影。於今年首次的中環F1街道表演中，James更被大會邀請成為飄移表演特別嘉賓，為本港車手爭一口氣。
邀星級車手增技術
在賽車場上，James認為自己仍有不小進步空間，要不斷學習提升技術，更邀請星級車手教授，永不言倦！
「近年內地車手邀請了台灣車手做教練，技術大躍進，加上自己去年參加了澳門路車賽，雖然因壞車而結束賽事，但自問技術仲有提升空間，所以過去一年我邀請兩位日本大師級職業車手為我特訓，一位是織戶學，另一位是谷口信輝，兩人都是當今炙手可熱嘅星級車手，有佢哋嘅教導，以前我落Brake嘅地方，家仲可以加速，變相造出更快時間。」
澳門賽道最吸引
世界各地賽車場多如繁星，但每年的澳門賽車仍能吸引數以萬計的車迷來觀賞，James話因為贏輸靠一個關鍵！
「澳門呢條由街道改建而成嘅賽道最吸引我，筆直大路由數個高速彎連接起嚟，而上山後全部由迂迴嘅大小急彎組成，據我兩位日本師傅所講，山上嘅細彎無論幾搏命幾快都好，車手們嘅分別都可能只係零點幾秒到一秒，但相反如果喺連接大直路的幾個高速快彎上落功夫，每個彎分分鐘可以快兩至三秒，呢個就係贏輸關鍵，當然要克服賽道兩邊無任何緩衝區，只得硬牆嘅心理質素，亦係澳門賽車場獨有嘅吸引之處。」
獨愛露筍天生好彎
參加了兩年澳門路車賽，James都是駕駛坊間稱為露筍的三菱Evolution8代作戰車，他認定它天生靈活好彎，非常適合於狹小的賽道使用。
「露筍8代雖然已面世數年，喺英美有好多改裝公司都有充足數據，改裝零件嘅售價同耐用度都較日本產品好。我部車家嘅最大輸出維持喺500匹左右，全車偷輕加上大量Topmix碳纖車身部件，車重只有1,260kg，配合專誠為澳門賽事研製嘅DryCarbon直傳動軸，面對600至800匹對手，相信可以喺直路緊貼其後，靜待彎中利用車輕優勢超越！」
後記：
今年，由於James戰車的馬力輸出跟對手有一大段差距，所以他認為能夠躋身前列位置，並且完成10個圈賽事算有交代，走出壞車的陰霾，期望下屆會更好。