PSV下個月出籠，幾款護航新Game算幾有睇頭，但稍嫌無乜RPG、SLG，可以畀腦龍瞓身喪煲幾十粒鐘，唔通仲拎住舊機玩《零式》？儘管PSV踢走UMD槽，不過SCE剛公佈，舊有UMD遊戲，透過PSP連接PS3作一次性登錄，便可用極「便宜」價錢下載PSV兼容嘅數碼檔案，將舊Game過渡至新機繼續煲。
所謂極便宜，暫且尚未有確實定案，只係話由100至2,500日圓不等。機迷反應各異，但普遍都認為無理由為同一款Game再畀錢，更甚者亦有人鬧SONY唔要UMD係陰謀，想乘機刮一筆。其實客觀啲睇，覺得唔抵嘅，大可用番PSP玩UMD啫，若果價錢吸引，花少少錢轉成下載版都唔錯吖，起碼可以好好珍藏隻原裝碟，而且撈Game又快啲。有蠱惑網友更提議，認證咗隻UMD後，索性賤價出售Cover番條數，一家便宜兩家着喎。