藝員溫裕紅（Esther）的四百餘呎之家玩歐陸田園風。未見實物，心諗：「會否太逼？」身處其中，感覺真的「Big」，不過是「空間」。更發現，簡約唔只係家的設計理念，更係Esther的生活態度！
記者：朱崇德
攝影：伍慶泉
鳴謝：Y'sConcept（28026700）
原木大自然氣息
單位操刀者是Y'sConceptCreativeDirector姚俊傑（Joe），佢最擅長觀察人的喜好、習慣，再融入室內設計中，估唔到全屋概念竟由一杯咖啡開始：「Esther帶我去佢最愛嘅咖啡室，嗰度充滿綠色植物細節同原木大自然氣息，所以單位玩歐陸田園風格就此定調！」入屋是一個深縱客飯廳，極Raw的灰白土牆，鑲上片片呈微象牙色直木條，賦予了極Warm的「家」的感觸。原木色地板，輕滲出玫瑰微紅的獨特顏色，Joe：「其實是仿木膠地板，好處是潑水不入，方便打理！」踩在其上，一樣有自然木紋坑的實在觸感。天花的木葉吊扇加吊燈，延續了田園格調。窗旁擺放了小桌，窗邊插了支支小雛菊乾花裝飾，坐在窗邊享受咖啡時光，迎着窗外輸送的微風，有種人在異國茶座的舒適感。
視覺營造空間感
以四十餘萬裝修費打造的四百餘呎小單位，為何會有如此擴闊的空間感？Joe話：「我是借用了點點眼睛錯覺！」與長形客飯廳成垂直鋪蓋的仿木地板，再延伸至牆身的直條木牆板，會令人有種更深縱的空間錯覺！不過Esther亦應記一功：「舊屋書刊、電影雜物頗多，現在六成掉了，或將有用的轉送教會；除發現空間多了，仲令我明白，人有時擁有的太多，實際需要的卻太少！」阿Joe話：「簡約唔單止係一種設計演繹，更係一種生活態度，就算你整間屋設計空靈，但一屋都是雜物也是枉然。好的設計除要切合戶主需要，仲要幫佢編配好生活！」
