闊別電視圈10年的張兆輝，最近被力邀回巢，在無綫處境劇《結．分@謊情式》與商天娥飾演夫婦，娥姐笑稱將畢生所睇所知的愛情故事融合其中。對於被網民力捧，張兆輝笑言：「好唔好戲係佢哋畀面，好多時係天時地利，如果當年唔係走咗去做生意，咪唔會有咁多時間去試新嘢。」 撰文：何慧斯
張兆輝和商天娥日前在將軍澳電視廣播城接受訪問，他們在戲內戲外經常行孖咇，原來目的是為培養老夫老妻的默契，張兆輝笑說：「做感情戲唔係咁易做，又要到肉，又冇越軌，真係好難㗎！」
女兒誤會移情娥姐
娥姐笑說：「我將畢生所睇所知所聽嘅愛情故事融合喺裏面，我仲會用筆寫低，以防不時之需，所以你哋問我哋會點演繹，有時都唔知點答好，因為我哋要睇完劇本同對白，再睇點將啲故事融入戲入面，嗰啲抵死嘢要啱角色先會用到。」張兆輝隨即補充說：「我哋冇女性嘅細心，好多男士都粗心大意又不解溫柔，唔識用女性心態睇，所以呢啲嘢咪要聽佢囉！」
處境劇受歡迎，是因為故事內容生活化，就像身邊發生的事情，偶然碰上了，便會發出會心的微笑，張兆輝說：「劇集嘅成績當然有信心，不過我反而希望觀眾睇完會有共鳴，而且又喜歡當中嘅小故事，我個女已經問我，係咪好愛娥姐？係咪唔愛媽咪？點解會同娥姐結婚？我咪解釋畀佢知，話佢聽只不過係拍戲啫。」
張兆輝續說：「以前喺無綫做啲角色，好多時都係古裝大俠、有錢仔或者差人，真係神仙都難變，再加上啲製作咁高效率，呢個未完又要做下一個，兩部劇又好似係差唔多類型，但係我喺出面做嘅角色，好多都係未試過，咪變咗有新鮮感。」難怪被指當年離巢選擇正確時，他笑說：「所以好多時係天時地利，如果當年唔係走咗去做生意，咪唔會有咁多時間去試新嘢。」
「最緊要活得開心」
最初《結》劇未出街，已經有不少網民在討論區內表示歡迎張兆輝回歸，還稱期待他與娥姐的演出，歸根究柢，全因好戲之人難求，張兆輝說：「好唔好戲係佢哋畀面，我只係將拍咗咁多年戲嘅經驗，用嚟拍一部戲。一部劇集要好多因素，睇嘅觀點好唔同，好似今次咁，可能人人想睇輕鬆嘢，所以咪覺得好囉。」
從82年入行至今，張兆輝坦言慶幸當年勤力，所以他未體會中年危機這回事，他說：「我家睇唔到喎，我淨係覺得好開心，冇以前嘅辛苦，又點會有今日？其實生活好簡單，係睇你點去安排，好似有啲人冇錢，唔通佢唔快樂咩？又唔係喎，只係睇你點去尋找快樂、點衡量。我有用呢套方法教仔，我叫佢用耐力、韌力去堅持，我嘅目標係身體健康，仔女聽話有自己理想，唔憂柴唔憂米，唔使發大達，夠食夠用就算。如果你食唔到又行唔到，仔女又唔聽話，就算畀10億你都冇用，真係好痛苦。」
娥姐認同說：「如果有一日我做到唔想做，會同老公周圍去，玩到邊住到邊，家我都同我老公講，做乜做得咁辛苦，唔使畀太大壓力自己，搵幾多食幾多，最緊要活得有意思同開心。」
