這個星期的某一個早上，我懷疑自己參與了一場假波，我發誓我絕對不是主謀，雖然最大得益者是我。
周中回到中學母校，與同學分享工作點滴是表面原因，暗地裏希望重溫踢西瓜波的樂趣才是主要目的。
偏偏踢波又先嚟落雨，以為好夢要成空了，早會之後老天爺又肯關上水掣，眼見上PE堂的同學們都興致勃勃的換衫換鞋踢波去，這位師兄亦厚住面皮叫阿sir受埋我玩，阿sir冇阻止我不特止，還借出簇新白飯魚一對，信我，在濕滑的地球場上，沒有任何一對名牌子比白飯魚的着地性能更佳。
在這兩堂跟隊的時間裏，我仿似坐進了電影院看着一套時光倒流二十年的電影，我仍然是我，而我身旁的同學仔，都一一變成了當年的老友記。
守龍門的那位是上身有些少「逼爆」的肥仔，點解守龍門的永遠是肥仔？唔好以為純粹因為佢跑唔快、速度慢，反而很可能是因為身形巨大，放在手球門框前面，實在是非常煞食的，唯一要求就是唔好怕俾人省，而我們這位龍門唔怕省不特止，仲會左飛右撲㖭，所以大家都沒有後顧之憂。
另外3位的隊友（小小籃球場踢波當然只能5對5），都擁有非常典型的造型，一位是6呎幾但動作笨鈍的高佬，好明顯他的強項不在足球場，但係男校又冇人陪佢打排球，焗住踢埋一份啫。
然後要小心保護的是5呎未夠的四眼書友仔，一睇就知佢係班房裏的班長、圖書館的常客、試場裏的巨人，球場對他嚟講是地盤重地，處處危機，所以頂頭槌時一定要除眼鏡！
當然陣中永遠都有一位校隊10號，他的球技令佢唔使講嘢，求其兩腳已經顛倒眾生，瀟灑得很。
講番假波事件，我嗰隊贏咗6場之中，我入咗5球，堪稱人生高峯！我發誓，對手龍門已經盡咗全力，要挑剔的話，可能係佢尊師重道啫。
文：keyman