猶記得那些年感動人心的《天空之城》、《風之谷》，PS3《二之國》童真畫風、奇幻情節RPG，就係由宮崎駿風格×久石讓黃金拍檔打造出嚟，在一片打打殺殺、無乜故事深度嘅遊戲世界，《二之國》着實係一股美妙清泉。
記者：韓繼聰
攝影：楊錦文
「宮」式童話美學
《二之國》中嘅動畫，由製作一系列宮崎駿作品嘅吉卜力工作室操刀，畫風甚具宮崎駿風格，加上移師至PS3高清平台，細緻畫質可謂重現動畫大師嘅仙境。故事講述主角Oliba因為貪玩，意外害死媽媽，傷心自責之際，精靈Shizuku出現，仲話只要拯救到「二之國」，就可救番阿媽。聽到呢度，係咪覺得古仔好「宮」式？唔止，聽埋久石讓夢幻壯麗嘅音樂，加上大量動畫交代劇情，感覺恍如邊玩邊睇宮崎駿卡通片，Fans一定好滿足。
遊戲一貫RPG玩法，主角將縱橫三大世界，四出學習魔法、合成精靈、打怪升呢。戰鬥系統以即時實戰進行，緊張刺激，走位攻擊仲要兼顧埋同伴，忙到甩轆。另外，合成系統亦係遊戲重點，令玩家可得到更強精靈，提升團隊戰力，幫你救國救阿媽。
限量魔金PS3同步推出
貴為萬眾期待嘅RPG大作，PS3當然隆重其事，特別為《二之國：白色聖灰的女王》推出同梱限量版PS3主機。主機及手掣以稱為「MagicalGold」嘅顏色打造，實體所見，係帶有淡金色的珍珠白色，非常美觀特別。機身上更印有同主角出生入死嘅淚精靈「Shizuku」，Fans必愛！另外首批遊戲更會附送實體魔法聖經一本，造型同主角手上嗰本一模一樣，印刷相當精美。書中詳細記錄咗各種魔法、精靈屬性、合成系統、故事等重要資料，睇熟佢包你玩得得心應手。較特別嘅係佢收錄咗二之國文字對照表，學識埋佢哋，你就完完全全投入呢個二之國世界。快啲揸實本魔法聖經，出發喇！
《二之國：白色聖灰的女王》
普通版（$458）
PS3同梱套裝（$2,688）
＊兩版本均附送NINOKUNI魔法聖經
