幾個天水圍維園阿伯口頭女，對象並非中女或者慾婆，而係有機會成為疑似特首的女候選人。
阿伯首選心口都有個勇字的葉劉，貪葉劉身家清白，肯定沒有麻甩的感情缺失。「不過，她的副手霸了官地起屋喎。」另一位阿伯搶白。「霸地好平常，鄉紳霸慣晒啦。家陣連入境處高官都係咁樣。大吉利是，井水不犯河水，生人唔霸陰宅就得。」
另一個阿伯是白姐姐粉絲，巴不得過票飛身出市區投姐姐清純的白白的一票。「點解白姐姐唔出來選，阿爺為乜唔開綠燈？」阿伯扮知情者爆料：「九成係跟兩位阿英有過節。斷估，過節唔係過情人節就係光棍節，明白晒啦。」
嫌葉劉篤數趕絕外傭的阿伯，全靠打了十年工的家傭阿Sa照顧，坐在輪椅上，用放大鏡睇真鼠王芬，愈睇就覺得愈似自己三十年前走了佬的老婆，因為合眼緣，所以支持阿芬出選。「二英一芬有台型，唔係一個嬲字，永無可能爆緋聞。」阿伯起哄說，索性緊急密令票后嫻姐出來推高收視率。婉嫻炒雙英不是一碟菜，是志明鬥春嬌的惡搞版，網友至like。