十一月十四日，林奮強到FCC出席午餐會演講，宣揚「黃金五十」，呢個題目佢已經講咗兩個半月，對記者傳媒、對大學生講過好幾次，又透過中大EMBA論壇上香港電台，更到屯門、荃灣、葵青、灣仔等地舉行townhallmeeting（在社區會堂進行），面對千幾兩千名街坊講述香港未來發展之道，得到相當正面嘅回響。不少街坊，由十幾二十歲至七、八十歲嘅聽眾都贊同林奮強嘅講法。既然如此，當日FCC宴會廳竟然坐滿人，連露台都擺埋餐枱，的確令左丁山感到意外。
林奮強兩個月來到處大聲疾呼，要求政府盡快正視香港發展機遇，多建甲級寫字樓以及商場，以免需求大大超越供應，逼到租金不斷上升，損害香港競爭力，大大不利青年人（80後、90後）嘅就業機會，政府要加快建設硬件，好似九○至九七嗰八年一樣，香港下一代先至能夠搭上發展列車。最令林奮強氣憤嘅，就係政府竟然保留中環街市，浪費珍貴土地，兼且遲遲唔拆政府山西翼以興建甲級商廈商場。按林奮強估計，香港未來三四年，需要兩座新ICC，先至可以應付不斷湧入香港嘅外資，大陸資寫字樓嘅需求。
中環街市不能動，已成定局，好彩林鄭月娥局長還算有guts，抵住一啲壓力，在十一月十五日宣佈拆建政府西翼嘅計劃，稍為令人失望嘅，就係不建商場，相信置地公司與皇后大道中嘅地舖業主會好高興，在今時今日環境下，好難得隴望蜀，算吧啦。
中環新商廈嚴重短缺，租金不斷上揚，趕走不少本地公司，新落成嘅陸海通大廈呎租叫價八十元，前龍子行呎租叫價六十元，仲話要揀客㖭，租務經紀話：「陸海通，以金融公司為優先租戶，其他行業要等等，你地不如搬去觀塘啦！」聽見就唔爽，有組織話唔相信政府之言，拆建西翼不是主流民意真係攞嚟講，唔通聽佢地甚麼關注組織就是主流民意？中環人要求有新寫字樓，就係市儈向錢看？呢啲人多受公民黨同路人影響，希望佢地唔好又搵人搞司法覆核！