范太徐麗泰果然宣佈唔會參加特首競選，佢拒絕說明是否遭人勸退，聲稱由自己一個人負責。啱嘅，一人做事一人當，范太還是有勇氣嘅。范太唔選，在意料之內，左丁山老早寫過論年紀與身體健康，范太都不宜過份操勞，退選十分合理。另一位葉太話過或會犧牲自己，為香港服務，有人聽到，就話：「香港唔想為葉太犧牲呀！」好咯，今葉太睇怕唔會再搞嘢，已經預留退堂鼓，剩番雙英對決，傳媒記者唔駛兼顧咁多，以後可以做特首競選新聞做得更深入嘞，讀者之福也。
暫時嚟講，唐英年民望由領先變成大落後，欲要收復失地，相信有排追，選民（即1200名選委）投票，理應以政綱為先，過往政績第二，人和（親和力）第三，其他小事，未必需要太兼顧；但對民望嚟講，不少「屎片專家」（SpinDoctor）都知道「認知」（perception）往往主導一切，小小事可以為競選人嘅親民形象大大扣分，譬如前泰國總理阿披實第一次參選時，在街頭嗌到聲嘶力竭，以紅酒為解渴飲品，即刻俾人攻擊為貴介公子，不識民間疾苦，阿披實讀書係Eton加牛津，確係與一般泰國人不同嘅，但唔好公開表現出嚟吖嗎。美國總統小布殊係有錢仔啫，但扮成一個普通牛仔樣，不少中下層美國男人以為小布殊係佢地其中一個，小布殊之對手加里（Kerry）又係有錢之人，坐巴士巡遊競選時，路經小鎮，扮與民同樂，在快餐店食芝士漢堡，但突然問侍應：「有冇法國芝士呀？」共和黨間諜立即將呢件事發放上網，抹黑加里脫離羣眾，令加里民望大受影響。
上星期六睇蘋果李八方，講唐英年家族五代同堂為父母慶祝六十年結婚紀念，竟然飲咗「七十萬紅酒」，左丁山睇到，嚇咗一跳，心諗乜嘢酒呀，貴得咁交關？李八方有冇寫錯，最好寫埋名貴紅酒名稱，等我地學習吓。原來唔係，唐英年後來在上星期日房屋政策論壇話佢地只係飲幾百蚊一枝（可能係買入價）嘅紅酒啫，其實佢啲公關人員已經反應太慢，理應星期六當日就猛咁打電話澄清啦，今時今日，做政治競選公關，實在辛苦，唐梁陣營各搵重量級人馬壓陣，呢場仗有排打。