有「三肺星」之稱嘅曼聯全能中場朴智星今年30有1，雖然星媽不停催婚，但好似就連女朋友都冇，成為南韓鑽石王老五。早兩日，美艷前南韓小姐金莎朗飛去曼市同星仔拍廣告，兩人仲好親熱咁共晉晚餐㖭。星仔冰封嘅心，唔通真係可以畀粒女神「金莎」溶化？
今個月初南韓傳媒報道話，金莎朗飛去曼市同星仔幫某男士用品拍咗輯廣告，今次仲係星仔第一次同韓流女星拍廣告。雖則「金莎」大星仔兩年，已經係一個33歲嘅中女，不過兩人拍埋睇落星仔成熟好多，金莎反而似20幾歲嘅少女！金莎朗咩來頭？如果各位有睇韓劇《秘密花園》，應該會認得佢。佢除咗係前南韓小姐之外，仲擁有1米73身高同埋34-24-34嘅惹火身材，曾當選「最理想身材曲線」及「最美胸部」第1名。
同金妍兒無疾而終
講番個廣告，兩個人情侶裝笑晒口，都不知影得幾sweet。仲有一幕星仔滿面剃鬚膏，個樣勁cute，搞到影緊佢相嘅金莎笑得好甜。佢仲勁讚星仔幽默：「同星仔相處真係好舒服，而且佢又好幽默，我哋一齊嘅呢段時間好開心，他真係一個又溫柔又可愛嘅好男人。」拍完廣告後，佢兩個一齊食晚飯，多兩支蠟燭氣氛就perfect！而事實上星仔都覺得金莎唔錯：「之前收到風會同金莎合作，覺得自己真係好運。」星仔平日喺球場上咁cool，我求大俠希望呢位「金莎」女神可以溶化星仔啦！
其實身為南韓國民偶像嘅星仔，早兩年同南韓滑冰女王金妍兒隔空傳情，鬧緋聞鬧到好似真係一齊咁；不過可惜最後無疾而終。唔多睇波嘅金妍兒09年趁世盃外亞洲10強賽南韓對北韓時，同傳媒講過：「希望星哥入波!」嗰場星仔入唔到波，賽後好後悔咁話：「回報唔到妍兒嘅期望，真係sorry。」2010年溫哥華冬奧會，金妍兒奪金，星仔寫咗一封「疑似情信」，信入面話：「妍兒，希望你唔好受傷，期待你優異嘅表現。」嘩，你話兩個人冇嘢，我求大俠都唔信啦！不過，可能兩人太忙，所以戀情無疾而終。
隊友hea碧傳投俄超曼城
星仔隊友「hea王」貝碧托夫，有人傳話佢下年1月會以1,500萬鎊（約1.8億港元）轉投「俄超曼城」馬哈奇卡拉。雖然似吹水多，不過「hea碧」家喺紅魔齋𢭃人工，曼聯想佢走都唔出奇；難怪佢經理人都話「hea碧托夫」會考慮轉會啦。