組合EO2嘅Eddie一直好專心打理佢間茶餐廳，馮仁昭聽聞佢有玩開三項鐵人賽，近排佢首次跟跑會去韓國跑馬拉松，第一次已膽粗粗學人跑全馬42公里，賽事限時5粒鐘，佢成績險守4小時50幾分，幾乎包尾，雖然成績差強人意，但佢好有體育精神，努力趕喺限時內完成賽事，至於跑完全程嘅心情，佢哈哈笑話覺得自己好有型。
跑完食5碗飯
比賽喺首爾出發，沿途經過風景優美小村莊，佢話：「成個賽事最難忘同痛苦係冇飯食，我係一個超級飯桶，教練要我比賽前幾日唔准食飯，所有澱粉質都唔畀食，因食澱粉質長跑好易抽筋。」跑完之後，Eddie同一班跑友第一時間跑去食飯，佢一口氣食咗5碗飯，有啲跑友仲食七碗飯㖭，佢話本來想再添飯，但佢唔夠其他跑友快，全間店嘅飯已經俾佢哋食清光。
Eddie同馮仁昭講下次目標要去東京跑全馬，目標時間係3個半鐘，佢仲講明下次一定要帶埋經理人文迪一齊去跑，佢話好多謝文迪，當初係文迪強逼佢做運動跑步，之後再迫佢玩三項鐵人賽，搞到佢對運動上晒癮。