一直恨女的陳慧琳（Kelly），今年3月公佈不幸流產，痛失孖女，潮媽不時把兩歲的囝囝劉昇（蝦餃仔）打扮成B女滿足己慾，近日再人工受孕成功的Kelly明年將圓B女夢，懷胎四個多月的她理應留家小心安胎，但她昨早和中午都如常出動送囝囝到紅磡返學，陀女湊仔，絕不偏心。
現年39歲的陳慧琳和老公劉建浩（Alex）酷愛小孩，雖然育有兩歲囝囝劉昇，但Kelly一直想圓追女夢，去年底曾人工受孕，懷有孖女，但懷胎5個月時雙胞胎出現問題，今年3月公佈流產消息。Kelly收拾傷痛，再接再厲，前晚出席活動時，孕味濃的她公告再懷孕的喜訊，據知她這次懷的是龍女，已懷胎四個多月，她吸取上次經驗，額外謹慎和小心安胎，不過Kelly昨早9時還是出動湊仔返學。
蝦餃仔變小丁蟹
蝦餃仔今年9月被揭入讀紅磡的St.Catherine'sKindergarten&InternationalNursery，開學初期，由於不太適應離開媽咪返學，女傭抱他入校門時，即呼天搶地狂哭，當時同行的Kelly為讓囝囝學習群體生活，狠心離開他。經過兩個月的學校生活，蝦餃仔火速適應，並愛上每天返學跟同學耍樂。
大肚Kelly昨早做廿四孝媽咪，與抱着蝦餃仔的傭人和經理人鍾珍，一行三人出動送蝦餃仔回校，Kelly負責拿着囝囝的背囊書包緊貼左右。蝦餃仔換了新髮型，驟眼望甚像《大時代》鄭少秋飾演的丁蟹，蝦餃仔穿白色短袖運動服配紅色長褲，非常醒目，就算見到記者鏡頭也不怯場，眼仔睩睩望到實，比媽咪更敏感鏡頭，只是鎂光燈太閃，蝦餃仔最初不習慣要用手背擦擦眼。
Kelly為安全計，昨日穿上便服和牛仔褲，腳踏矮踭鞋。她昨早帶着囝囝出現校門時，看到記者，她笑容滿面說：「早晨呀，畀我哋行，唔好影響佢哋（指其他同學），一陣鬧鬼我，放學再影啦。」學校保安為Kelly母子和其他小朋友開路，Kelly直送囝囝入班房，再逗留一會才離開。
教囝囝揮手飛吻
中午12時多，Kelly又再出動接放學，繼續由女傭抱着蝦餃仔離開，Kelly邊行邊教囝囝向記者揮手和飛吻，蝦餃仔甚聽話照做，他的左手拿實玩具車仔，騰出的右手就向記者飛吻和揮手，可愛爆燈。變身小丁蟹的蝦餃仔，面容仍像小女生，白皙肌膚十分滑溜，美中不足是右臉頰有着小紅點，Kelly說：「佢俾蚊咬。」接完蝦餃仔後即離開學校回家。
Kelly今年3月流產，花了三個月時間調理身子，然後再進行人工懷孕，至今陀B四個多月，身體逐漸適應，Kelly表示懷胎後胃口很好，沒出現嘔吐不適，只是較易疲倦，她昨日在電話中說：「陀咗BB易攰啲，我家跟蝦餃仔嘅時間表，佢夜晚9點瞓，我都去瞓，佢第二朝7點起身，我又跟住起身陪佢返學。」
轉口味愛三文治
醫生叮囑Kelly要注意飲食均衡，Kelly說：「因為啱啱陀B，我唔敢立亂進補。」胃口可有特別轉變？她說：「唔知點解，我今次特別鍾意食三文治，最鍾意係腿蛋、牛油果雞肉同吞拿魚呢三款；至於食餸，我就好鍾意酸酸哋嘅檸檬雞，好醒胃。」Kelly雖對胎兒性別三緘其口，但她的老爺奶奶以及Kelly父母都雀躍迎接小龍女成為劉家新成員，劉媽媽和陳媽媽為了令孫女更健康，每周必給Kelly送上愛心靚湯。
採訪、攝影：彭琮然、比華利
話你知
中醫：要食中藥補血氣
陳慧琳懷孕四個月，表示不會亂吃中藥進補，就懷孕期間應否進補，中醫師余祐遠昨日說：「亂食當然唔好，但絕對要食中藥調理身體。」
針對性進補
余醫師表示食藥首先要按照孕婦需要，例如腎虛就要補腎，作出針對性的進補。不過一般孕婦，尤其曾流產的婦女，多是血氣不足。血氣足對孕婦相當重要，如連續流產中醫稱為「滑胎」，血氣不足正是「滑胎」原因之一。
有些婦女產後會甩頭髮甚至甩牙，就是嬰兒攝取了母親的營養所致，故孕婦產前產後補血氣相當重要，余醫師說：「中醫有一道藥方叫『泰山磐石丸』，專補氣血不足。」此藥方一般都適合懷孕期間的婦女。
採訪：羅卓姬