26萬老麥前級一開三　膽色過人

AV發燒界稱為「老麥」嘅美國McIntosh（麥景圖），喺音響界已超過60年歷史。由真空管黃金年代到現在，旗下前級放大器繼續勁玩大功率、高儲能以及超寬頻概念，就好似今日呢款C1000，有別見慣的一體式設計，三機獨立各司其職，膽機訊源經獨立處理，聲厚音準，絕對係膽色過人。

記者：陳國輝
攝影：伍慶泉
Model：Rika@GME

新手　以平衡度為主

音響專家阿Ken建議，初入門玩擴音機不妨先選擇音色自然，平衡度高嘅產品為主，但如果特別鍾情於某類型音樂，例如玩重低音效果或節奏暢快嘅樂曲，傳統原子粒機就比較適合；相反，聽人聲當然玩膽機好啲，至於入場費則相對昂貴。

音響專家Ken

原子粒×膽機　雙管齊下

或許「老麥」看透發燒友愛視覺上嘅享受，三組機設計好一致，除體積相若之外，金屬鋼條緊包機身邊角，表面更採用三塊約10mm厚嘅玻璃作為裝飾，極有自家一套風格。然而講得上誘惑，勢必數到冰藍色錶板，指針一晃一動，反映出高低頻之間嘅速度和力度，同時呢項設計仲取得專利。但個人覺得更搶眼，都算係四盞螢光綠色膽，以及好歐洲中世紀Feel嘅Logo，若然熄晒燈躺於梳化上細心聆聽，簡直要用迷人去形容。
音響專家阿Ken話，C1000之所以分為控音加電源供應器、原子粒以及膽機三組，目的係發揮每部機最大效能。舉例說，膽機可突出人聲嗰份沉厚聲線，而原子粒機側重於音樂細緻部份；假如第一首歌用膽機嚟推，第二首轉原子粒機，可以點處理？阿Ken話一般前級未必兼備膽同石英，而C1000最大優點係一部控音加電源供應器處理兩類型前級，只要事前設定好，你就可同時於一張CD專輯內，欣賞到由原子粒以及膽機所推動嘅唔同味道。

■厚厚玻璃後，可清楚見到中間4支膽，聽人聲一流。

■跟機包括一隻普通Remote，以及全金屬物料作裝飾性嘅遙控。

■音量掣備有213級微調，可作每級0.5dB增益調節。

■按鍵上嘅塗層經人手多次處理，要求嚴謹。

特厚玻璃壓頂　防諧震

分體式設計嘅好處，除咗可獨立選擇聽膽或聽石英，控音兼電源供應器更令播音樂時所產生嘅諧震，降至極低水平。阿Ken解釋，C1000跟早期型號一樣，除配置獨立火牛，以免供電時造成音色唔穩定嘅情況之外，亦由於佢採用分體式設計，因此也改良咗供電部份。為求達到選擇音源時不發出噪音，C1000採用由50個電磁式元件組成咗電磁式開關電路接觸通訊，令運作時更寧靜，亦不會對音訊造成噪音干擾。
C1000在機殼上也加裝特厚玻璃，除機身正面三塊，位於頂部處，仲有一塊同樣咁厚嘅玻璃，據講亦可減低底板運行時產生嘅輕微諧震，令音色更純淨自然，達致最高嘅還原度。