開口埋口「屎屎聲」認真不雅，人稱Scatman的生態專家溫柏豪卻百無禁忌，其研究項目的確「屎」無前例─糞便如何幫助森林恢復。動物進食植物果實後，牠們隨處排便，糞便內藏數以千計種子散播在郊野，變相植林。幾乎日日上山找屎的溫說：「連屎都咁有用，青年人唔好再話自己冇用喇！」
記者：袁慧妍
又到行山季節，28歲的溫柏豪帶記者到港島南區大潭郊野公園行山，不是欣賞鳥語花香，而是找屎，尋找靈貓科動物的屎迹。研究森林恢復的專家很多，他是香港首位以糞便做題材的人，「個山周圍都係屎，你以為係廢物，好唔顯眼，踩扁咗都唔知，其實佢哋真正係『黃金』。」
溫柏豪由「乜屎都唔識」，到日日上山找屎，夜夜在研究室「洗屎」，在最原始的種子傳播方法中，參悟大自然「屎」路中的智慧和生機。溫說在眾多動物糞便中，以靈貓科糞便中的種子有效傳播率最高，「佢哋食完就周圍屙，又唔會整爛粒種子，免費幫被山火焚毀嘅森林恢復。」
香港的靈貓科動物只有果子狸及小靈貓（又名麝香貓），前者在樹上棲息，後者在地上生活。夜間出沒的靈貓科是雜食動物，既吃果實又吃肉類，「只係食本地植物，例如韓氏蒲核、羅浮柿及榕樹等，貪佢夠juicy。好似紅膠木呢啲外來種，果實太硬又乾爭爭，唔啱佢哋食。」
帶狗行山嚇走果子狸
由於果子狸及小靈貓需要喝水，溫柏豪帶記者行離原有山徑，走到溪邊，在大岩石上尋找屎迹。「家庭觀眾真係切勿模仿，走嚟呢度係因為小靈貓始終係動物，唔一定屙喺山徑。」找了個多小時，終於在路邊發現第一堆糞便。溫拾起樹枝，熟練地夾起已乾涸的糞便，「呢嚿冇種子，又冇昆明甲殼，照樣睇應該係狗屎。」動物喜歡用糞便來霸地盤，行山人士帶狗隻上山，狗隻若留下糞便，變相會趕走果子狸及小靈貓，「唔好講狗屎，人嘅屎都有，路邊有啲紙巾，部份係啲人屙完之後留低。」
「青年咪話自己冇用」
又再找了半小時，溫柏豪走到路邊的大石上，今次終於大叫「搵到屎喇」！該糞便呈啡黑色長條形，長約10厘米，糞便滿是昆蟲金邊土鱉的甲殼，「植物通常夏天開花結果，小靈貓搵唔到果實，就食住呢啲頂檔。」從糞便看，他推算小靈貓身體加尾巴長約一米。
溫柏豪讀生態學碩士時花兩年時間研究糞便，又把部份種子放回「執屎」的原地上，發現有四分之一種子發芽，「個成績都OK，果子狸同小靈貓冇諗過自己有咁大貢獻。不過政府只會揀植樹，唔肯等啲種子自然生長。其實有好多人同佢哋一樣，喺呢個世界默默耕耘，只係我哋未必留意到。連屎都咁有用，青年人唔好再話自己冇用喇！」