踢波唔夠人叻點算好？咪盡力畀心機踢囉。不過禮拜二世界盃亞洲區第3圈外圍賽，C組嘅北韓主場對日本；主隊為求贏波，真係不擇手段。出茅招搞到日本班球員喺機場等咗4個鐘，疲態盡露結果輸0:1！而北韓贏波之後，主場球迷極為興奮，仲送埋球員上隊巴，十足十香港喺85年5.19贏國足咁風光！
06年北韓測試發射嘅導彈飛過日本領空，搞到兩國關係勁僵。之前喺9月進行第1輪分組賽時，日本海關對北韓隊諸多刁難，極有可能係今次北韓海關玩嘢嘅導火線。據《朝鮮日報》報道，日本國家隊禮拜一抵達平壤順安國際機場，而由於事前北韓外交部已經先旨聲明，日本職球員唔可以帶任何電子產品，就連手提電話都唔得。所以，日本都早有準備，冇帶埋去北韓比賽，將啲嘢放喺轉機地點北京。不過，喺機場過關嗰時，先真真正正出事。
連蕉都無得食
喺海外比賽嘅國家隊，多數都會行特別通道；但係北韓就係都要日本全隊排隊，要佢哋行普通通道入境。啲機場職員對住張入境卡逐樣問，仲要班日本職球員詳細作答。家考入籍試呀？唔單只咁，佢哋仲沒收晒日本球員帶嚟嘅香蕉、香口膠同埋杯麪。我求大俠聽到都嬲嬲哋，唔通北韓怕啲日本球員會拎啲零食出去賣咩？呢啲舉動，搞到日本球員開始鼓譟，不停問幾時先搞掂。最後喺機場擾攘咗成4粒鐘，搞到原本晏晝5點鐘嘅賽前操練，順延至晚上8點先開始。日本成班球員一定勁攰，加上場波係踢人造草，北韓要贏又有何難度。
北韓球迷開心如贏世盃
日本傳媒都有報道國家隊畀北韓海關玩，不過班球員喺輸波之後，卻對入境單嘢隻字不提。後防今野泰幸反而話番自己：「我哋打咗90分鐘都唔知做緊咩，北韓完全控制戰局。」教練沙哲朗尼就寸嘴話：「佢哋對日本應該都好大壓力，壓力有幾大可以喺佢哋有幾多張黃牌呢方面睇到。」至於北韓球迷就開心到好似贏咗世界盃咁；喺球場外面等班球員出嚟，仲一面拍晒手掌，一面嗌晒口號咁送班球員上車，係咪好似當年香港5.19贏國足之後，喺啟德機場嘅場面呢？
不過唔同嘅係港隊憑實力取勝，北韓真係要反省吓啦。