美國共和黨總統候選人初選，已進行得如火如荼，不斷舉行候選人辯論會，由不同媒體主辦，最近一次在密芝根州羅徹斯特市舉行，據講辯論平平無奇，表現較佳者係隆尼與金力奇。至於近期民望急升嘅黑人HermanCain，因性騷擾傳聞纏身，CNBC之靚女記者瑪莉亞追問，本以為難以脫身，但入場聽辯論嘅共和黨選民噓聲四起，係噓瑪莉亞噃。全晚最矚目嘅事情竟然係德薩斯州州長RickPerry，佢在台上強調入主白宮之後，佢會撤消三個部門，節省聯邦政府經費，邊三個部門呢？死咯，Perry一路數手指一路講：「商務、教育……」跟住死咗火，猛揭貓紙，數手指，竟然冇嘢講，一位主持人追問：「第三個係……？」Perry最後一面茫然咁話：「第三個？唔……，Sorry……Oops。」
一個人在辯論台上，全國電視鏡頭前，竟然如此出洋相，佢嘅選舉助手、公關、支持者相信面紅到要搵窿捐。Perry為何如此？好可能係六十歲人，腦筋轉得慢，一時唔記得，但金力奇已年過七十咯喎，仲係反應敏捷到極，又或者係Perry對政策認識膚淺，背書不成就完全唔識講嘢。經此一役，相信Perry已經玩完，幾難搵人捐錢支持佢嘅競選活動。
他日香港或會有特首候選人上台辯論，電視直播，到時會唔會有人大聲疾呼：「我做特首之時，有三件事優先處理，第一，加建公屋，第二，增加綜援，第三，第三……唔，唉，對唔住，唔記得咗！」如果有此目前係虛構嘅事件發生，該候選人在辯論後可以立即宣佈退選都得咯。
此乃公關顧問人員，辯論訓練員之惡夢，見到Perry台上死火之「真人騷」後，直情想死。Perry成為全美笑柄，但佢之EQ一流，即刻去紐約出席Letterman脫口騷，以TopTenRickPerryExcuses為題，自嘲自諷，希望以幽默博取一啲同情分，呢一個公關招式，前所未見，值得香港公關人員存記。霍士電視台訪問兩位醫學博士，一位係女教授，一位係男神經學家，佢地指出在台上發表談話，突然腦筋空白，科學原因係腦袋存儲記憶體細胞，與腦袋向外溝通細胞，突然disconnect（斷線），淺白啲講，一個人緊張、疲倦、睡眠不足，講說話太快，受到旁人壓力（特別在辯論時），都可能出現呢種情況。左丁山又向辯論隊教練賓架S請教，佢話最簡單解釋，就係事先訓練不足，公關人員預備嘅cuecard做得差喎！