巴塞隆拿唔單止好波，仲一啲都唔蠢，以備戰世冠盃為理由，唔肯同家陣cap緊亞洲人水嘅皇馬，喺香港時間晚上7點比賽，場波照舊開深夜5點。不過，巴塞咁做，就令亞洲球迷受難，特別係大陸同本港球迷，冇得用場西甲國家打吡嚟撈飯之餘，兼要繼續捱眼瞓。
意大利《米蘭體育報》日前就報道，皇馬係吸金王，上季總收入就達4.8億歐元（約51億港元），其中電視轉播費就高達1.53億歐元；至於排2、3位嘅就分別係巴塞同英超勁旅曼聯，總收入係4.47億歐元同埋3.67億歐元。雖則皇馬搵咁多，但錢冇人嫌多，特別係佢哋支出咁龐大，有得搵，唔通唔搵盡佢咩？家陣佢哋就全力進軍亞洲市場，希望可以喺富有嘅國內同胞身上掠一筆。
炒「沙」亞洲熱賣想添食
皇馬本月初史無前例打西甲禮拜日早場，喺當地時間正午12點主場對奧沙辛拿，而據了解，單係喺中國，就有成6,000萬嘅中華兒女見證佢哋點樣大勝7:1。收視咁理想，佢哋當然想添食啦，所以就希望將下個月喺主場對巴塞嘅國家打吡，再次安排喺禮拜日正午12點（即係香港時間晚上7點）開。戲碼咁強咁勁，收視人數分分鐘過億，利字當頭，加上場波喺佢哋主場巴拿比奴踢，佢哋梗係希望巴塞肯答應啦。
可惜巴塞就唔係咁諗嘞。打早波對作客嗰隊好唔着數，班球員喺酒店一早瞓醒同食完早餐之後，就要落球場準備，難聽啲講隨時連魂都未回，臨場隨時夢遊球場，就算係地上最強嘅美斯，都可能會廢咗一半武功啦！巴塞唔係kai嘅，點會俾皇馬搵笨呀，於是以備戰世冠盃為藉口，話要喺下月11日朝早由馬德里出發前往日本，硬生生拒絕咗皇馬嘅建議，唔同佢哋癲打禮拜日早場。
土皇帝古迪遭炒魷
呢場國家打吡會喺下月10號晚上10點開波（即係香港時間深夜5點），搞到皇馬勁唔開心，我求大俠相信屆時仍有唔少亞洲球迷會捱夜睇，但有冇成幾千萬人咁神心，就好有疑問囉！另外，前皇馬中場古迪一樣咁唔合皮，點解？呢位35歲嘅前西班牙國腳因紀律問題俾土耳其比錫達斯炒魷囉！