雖然全城熱搶iPhone4S，不過炒賣度對比舊機，確實弱咗不少，連先達友都話今次無乜可能炒足幾個月，神話無以為繼。同先達JuicyBird文哥傾開偈，佢話行貨派街翌日，新鮮熱辣但收機價唔算高，16GB大概只有$6,300。不過近日有回升迹象，截至噚日為止，先達16GB收機價已升到上$6,800。突然好景？其實只係小陽春啫，文哥放番出嚟只係約$7,000，係咁意微執兩嚿水。勝在嚟得快去得快，以平均每日約50部交收計，已淨袋一萬。文哥仲估計，個價仍然會微升，估計大概$7,200見頂，遲多一兩個禮拜相信會開始回軟，陸續收到行貨機嘅用家，唔好太貪心期望佢再升，啱價就好走喇。