荷李活影星奇洛李維斯（KeanuReeves）上月底被拍到同姍迪娜布洛（SandraBullock）喺比華利山約會，離開時刻意分開，令人懷疑未必係拍檔敍舊咁簡單。不過佢哋就算想發展都未必有時間，事關奇洛日前又飛咗去北京，籌備自導自演嘅處女作電影《太極俠》（ManOfTaiChi）。
探成龍班
奇洛日前仲喺北京同黃聖依見面，之前佢喺北京睇過李連杰同黃聖依主演嘅《白蛇傳》，對黃聖依有印象，所以戲中有角色想搵佢做，最終未有定案。除咗見黃聖依，噚日奇洛又去探成龍班，原來佢哋喺美國已經認識，當佢知道成龍喺北京拍緊《十二生肖》，即刻走去片場敍舊。
雖然奇洛知道周星馳要拍《太極傳》，李連杰又搵李安合作搞《耍太極》，但佢仍然堅持拍，除咗男主角決定由佢師傅陳虎做，其餘角色未落實，武指就傾掂由袁和平（八爺）擔任。咁啱李安嗰部又想搵八爺做，但應該冇乜衝突，因為兩部戲風格完全唔同。