中文大學崇基學院創始於一九五一年，由前廣州嶺南大學來港人士及聖公會主教何明華會督等人創立，首位校長李應林教授便是廣州嶺大最後一位校長。初時借用聖保羅男女中學的課室上課，後買得馬料水火車站旁的村地建校，後有高山，前有吐露港，彼岸是馬鞍山，可說山明水秀，自然人傑地靈，人才輩出，其中一位畢業生陳玉樹教授便是今天香港嶺南大學的校長，李應林教授天上有知，當會老懷大慰。
十一月十二日，崇基六十周年校慶晚宴在會展舉行，有一千六百餘人參加，晚宴籌備委員會人才鼎盛，主席是金管局總裁陳德霖（社會學1976），大會統籌陳黃穗及創作總監葉潔馨等等等，不能盡錄。左丁山唔係崇基人，但大賓架彭玉榮邀請出席，梗係欣然赴會啦，見識吓都好嘛。到達會展新翼三樓大堂外，竟然見到崇基校門裝置，嵌上校聯：「崇高唯博愛，本天地立心，無間東西溝通學術；基礎在育才，當海山勝境，有懷抱與陶鑄人羣」，難怪不少校友未入門，已要影相留念。進入「校門」，不少人與左丁山打招呼，一位小師妹仲話：「乜你係崇基嘅咩？」冇資格，想當年，考中大入學試成績不入崇基法眼，到崇基之「面試通知書」時間係面試三日之次日上午，但收到新亞與聯合之「首日上午面試通知書」，當然唔敢托大到去崇基面試啦。
崇基有大量海外校友回港共慶六十周年，一位女士好熟絡咁同左丁山講hello，話自LA回港，死啦，佢係邊位呢，唔記得咗㖭，後來先至醒起佢係當年校園一位活潑到極跳跳紮嘅小肥妹，急忙想搵番佢聚舊，但大堂內有千幾人，又不知她坐在何方，卒之搵唔到，為之惆悵。
賓架彭平時熱心做學生嘅學長（mentor），近年只收男生為mentee，好好心機輔導。此晚買餐券請咗四位崇基mentee，安排佢地坐在前警察一哥李明逵與剛於九月退休嘅馬會財務總監李保祿嘅旁邊，跟呢兩位經驗豐富嘅高人學番幾招，學生應該大有裨益。大型校友晚宴，唔需要甚麼表演節目，各校友自然會周圍串連，輪流上台影大合照，每次有幾十人至百幾人，好不熱鬧，不少同學係幾十年後重逢，是晚一別之後，不知何日再相會了。