文化傳信（343）噚日出通告，話同「音樂天才」周杰倫嘅經紀公司簽咗合約，一齊發展由「你得既科技（澳門）有限公司」搞嘅「3D互動遊戲社交網站」Ucan.com，周董做「你得既科技」股東之餘，仲會擔任全球文化大使，為期兩年。
明星股多「短命」
個3D社交網講到尾其實即係onlinegame網站，但搵到周董入股咁犀飛利？華華即刻上網睇吓，點知個site得兩頁咁大把，內容欠奉，話要下個月先正式啟用。不過，文傳噚日午市一開，砰砰聲由8毫炒上8毫4。可惜，好快就冇承接，最後收8毫，倒跌4.8%。
其實藝人踩入上市公司，股價多數「短命」。唔信？近年藝人做企業揸fit人，要數周星馳嘅比高集團（8220，前稱帝通國際），公司喺內地大搞電影同戲院，股價都係「先甜後苦」，由去年初1毫子起步，去到3月炒到上0.355蚊，之後就唔見影，今年9月變番仙股，星爺都冇計。
再講遠啲嘅話，科網股熱潮時，成日「認叻」嘅陳百祥，夾埋譚詠麟同曾志偉合組東方魅力，收購當年DC財務借殼上市，為藝人搞網站，股價99年由10蚊炒到67蚊，但公司賺唔到錢，股價好快打回原形，最後仲賣埋盤，家叫星美國際（198）。
前車可鑑，散戶想藉「周董效應」炒一轉，都係嗰句：轉身要快，唔掂就閃！
李華華
mailto:[email protected]