歐國盃附加賽一啲都唔好睇，邊4隊出線都唔慌贏到冠軍，睇友賽好過，睇德國！
我一路都想講吓青蛙仔隊德國，我雖然係意大利躉，而西班牙又好似只係有啲跌watt，不過我夠膽講句，德國真係出年歐國盃最有冠軍相嗰隊；逐件秤，意大利個個都輸，所以可以飛咗佢唔講，就拎狂牛同德國比比。
講守，德國世盃已經打起咗紐亞，後防又有得分中堅曉姆斯，搞到蘋果波神愛將梅迪薩卡危危乎，隊長拿姆經驗又夠；唔同西班牙，佩奧爾年紀大機器壞，而我鍾意嘅沙治奧拉莫斯，始終都係唔夠穩，防線，兩隊打和。
中場就打得燦爛！德國近年出咗幾多花你數得晒冇？奧斯爾同湯馬士梅拿後生細仔已經係大佬，加埋多蒙特嘅哥斯基奧斯同馬里奧葛斯，幾高效率，當中仲有個馬高列奧斯、可翼可鋒嘅舒賀爾尼，出年打完你先識就真係唔好話自己係球迷！西班牙呢？打嚟打去都係恩尼斯達同沙維，冇錯佢哋係勁，而我相信出年都應該仲會勁，不過夠唔夠德國班細路咁有鬥心？中場，德國高啲噃。
講前鋒，馬里奧高美斯終於都出頭，呢個成日軍look打扮嘅高大衰，今季幫拜仁同德國入過幾多粒？幾多次首球？數唔到！仲有個老鬼高路斯同上面講過嘅舒賀爾尼，卡卡奧都係摺埋算，高美斯一個夠！西班牙個韋拿開始莫莫哋，廢托都唔慌可以彈得番起，洛蘭迪又只係死衝爛衝，照咁睇，前線都係德國贏！
2:1！如果呢兩隊喺歐國盃碰頭，一於買呢個波膽！不過認真講句，馬會一開飛，至少要買番廿萬德國冠軍！
文：守丹