由張栢芝同任賢齊主演嘅《楊門女將之軍令如山》會喺11月18日公映，噚日導演陳勳奇、鄭佩佩同周海媚一齊去廣州做宣傳，但男女主角無影，場面有啲冷清，好彩陳勳奇同佩佩姐玩即場爆料，令現場記者唔會冇料交功課。
陳勳奇話栢芝落實接演呢部戲嘅時候，親自欽點小齊做佢老公，陳勳奇話：「我畀咗幾個男演員栢芝揀，佢話以前同小齊合作過，如果搵個未合作過嘅人演楊宗保，火花可能會無咁快出嚟。」其實一直有傳劇組對栢芝百般遷就，估唔到權力大到可自由揀男主角，認真巴閉！至於話栢芝片酬高達千五萬人民幣，陳勳奇話自己對數字好盲目，只要有人肯投資乜都係值得，佢仲話覺得栢芝無論個性同氣質都好適合演穆桂英。講完栢芝，佩佩姐亦唔執輸大爆成龍曾自薦反串演佘太君，擺明同佢爭飯碗。
栢芝cool爆
雖然栢芝缺席宣傳，但仍冇時間返屋企照顧兩個乖仔，因為日前佢就返咗上海為某活動做宣傳，換上便裝準備離開嗰陣，栢芝見到有大班記者同粉絲守候，面容cool到爆，一邊行一邊蹺住手，最後喺大班工作人員護送下上車離開。