機仔出術變超Wide　17mm瞓身影

相機仔DC想影得Wide，又無法換鏡，有咩計仔？Casio就度咗一條絕橋，最新推出EX-ZR15數碼相機中，就可以利用連拍功能，將多張相片合成砌出一張廣角相片，最Wide仲可有等同17mm嘅效果，就算靚女海棠春睡都影得晒喇！

記者：許福合
攝影：楊錦文
Model：Jess@PureModels

超廣角靠拼湊

叫得EX-ZR15機仔，機身當然的骰過人，放入衫袋絕對無問題，CMOS亦高達1,610萬像素，一般拍攝都好夠用。正因為機細，鏡頭焦距相當於35mm的28-196mm，未算突出，不過憑機能輔助，可以影過界拍出17mm超級廣角。這其實是BestShot內的廣角拍攝模式，啟動後，畫面出現一個框邊，只需上下左右四方向連續掃拍，相機便會將眾多相片合成一張17mm超廣角相片，情況有點似一掃全景，不過就玩埋上同下，接駁效果仲相當不俗㖭。
有幾點要注意，首先被攝的景或人都不能有大動作，而掃拍時要盡量貼近框邊移動，否則會「駁爛相」甚至拍攝失敗。

■3吋超高清LCD屏幕，室外睇都清楚。

■鏡頭有28mm廣角，居然有計拉到17mm闊。

■用廣角拍攝模式時，相機會提示以直度拍攝，跟住佢影就搞掂。

■仍採用傳統變焦環，不過去到28mm，可再加特效變得更Wide。

■按BS進入BestShot內，就可用到相機輔助模式影靚相。

好玩特效多籮籮

ZR15操作基本上係全自動，所以想拍出靚相，最緊要選啱Mode！試用時最喜歡用就係模糊背景，簡單啲講就係淺景深效果，只要景物同背景相隔一米左右，背景就會模糊化，效果就有如拿支F1.8大光圈拍攝一樣，影女、影花草都一流！另一個提升畫質方法係用HDR，可以連拍合成一張光暗分佈均勻的靚相，大背光都無有怕，而且連拍速度夠高，駁壞相機會較低。而HDR的變種HDRART藝術模式亦有提供，繼續大玩油畫效果之餘，新機仲可將這種效果帶進影片內，拍攝出全高清效果的HDRART影片，影片重播會有更趣味。