獅子行首階段裁員行動，上個禮拜四開始大規模派信，呢幾日仲有零星動作。噚日華華聽聞，近年化身滙豐慈善關愛嘅icon人物──亞太區企業可持續發展總監區佩兒（Teresa），喺瘦身計劃下，已經收咗大信封。
華華記得，滙豐9月7號公佈「攞你命三千」行動後，翌日撞啱獅子行慈善基金成立30周年典禮，各路工會拖行馬，囤積喺總行地下示威，搞到亞太區行政總裁王冬勝要臨時缺席，結果由Teresa同勞工及福利局局長張建宗主持慶典。
任職滙豐廿幾年嘅Teresa，喺集團最新八級編制內，職級排名第三級，屬地區部門主管，伊人原任滙豐亞太區個人理財業務服務及銷售主管，06年下旬獅子行展開5天工作制，就係由佢宣佈，約1年後轉任現職，向集團企業可持續發展主管SimonMartins滙報。