名媛去Ball最驚撞衫、撞袋，堂堂跨國公司最驚嘅係撞名，好似英國保誠（2378）同美國保德信咁，英文名都係Prudential，搞到保誠要改名換姓。
話說亞洲區業務係英國保誠近年嘅發展核心引擎，但Prudential嘅商標權喺人哋手，為咗唔好令亞洲區客戶混淆，惟有將旗下亞洲區資產管理公司改名做「瀚亞投資」（EastspringInvestments）。執行總裁馬信話，香港區要等監管部門審批，最快都要明年上半年先可以換新名。
有咗新朵，保誠亞洲區執行總裁王力導話，以後仲可以進軍埋其他對頭公司嘅地盤，好似北美等嘅新興市場。雖然想搶多啲地盤，但佢就唔吼滙控（005）有意打散出售嘅亞洲區非壽險業務，話唔係保誠核心策略。