晨早一杯甘醇咖啡總能排眾而出，任其焦香氣息鑽入鼻腔，人都醒神啲。自己動手冲，將幾十元至數千元一部咖啡壺、咖啡機私有化，最重要係唔使再捱「聞落頂呱呱、飲落叫阿媽」嘅劣啡！
記者：朱崇德
攝影：楊錦文、劉永發
Model：Irene@GME
入門壺 冲中至粗研磨咖啡粉
玩咖啡好富貴？問iCook廚具達人Max：「唔使一下子花幾千蚊買部全自動或半自動咖啡機，有時舊式全手動，更能享受到冲泡過程。五分零鐘冲好一杯，整件事充滿玩味；介紹大家入門三款，可以冲泡中度或粗度研磨咖啡粉。」
Max教室：DIY泡沫
齋啡少玩味？iCook廚具達人MaxWu話，喺屋企都可以輕易來杯泡沫豐富嘅Cappuccino，最基本條件係：「屋企要有部微波爐同全脂牛奶！」
1.意式蒸餾摩卡壺 易出油香
即傳統意大利咖啡壺，三層爐身，底層注水後直接放爐上細火燒，沸騰水蒸氣高壓推過中層咖啡粉，就會變成濃度如Espresso嘅咖啡凝聚於頂層！設計同半自動式咖啡機有啲似，冲出嚟嘅咖啡係三款中最能冲泡出咖啡油，口味較濃重。
2.法式壓濾壺 水溫90℃
高瘦玻璃圓筒配活塞式濾器，將約90℃熱水及咖啡粉注入圓筒內泡五到七分鐘，等兩者有充份時間接觸，然後才以活塞濾器將咖啡粉壓到底部就有靚咖啡飲。適合初學人士，可以話係簡單快捷就可以冲到杯風味咖啡嘅選擇。
3.越式滴漏壺 先浸後泡
買越式咖啡粉多隨包裝附送，係大家最易接觸嘅款式。一般以銻做的面層較易氧化，不銹鋼靚版上海街唔使五十蚊。使用時留意先用小量熱水浸濕咖啡，待分零鐘讓咖啡粉發起，再分三次以打圈方式注入水，就最能冲出咖啡真味。
家用推介
最堅野生貓屎咖啡
得機無咖啡，冲乜先？講到香港人嘅咖啡，一定要識榮陽（1929年）！佢係香港第一家自己烘焙咖啡豆嘅公司，負責人黃冠樺（咖啡黃）近年引入咖啡中嘅極品、印尼蘇門答臘100%野生麝香貓品質，更為首家獲印尼領事館認證：「咖啡豆經麝香貓腸道消化，豆中蛋白質被分解，令到咖啡中苦澀味盡去；再經過乳腺體令咖啡豆產生有如麝香獨有味道，好濃烈，飲完後久久不散！市面好多麝香貓咖啡都係『養貓』所出，由於佢哋食齋（水果），絕對唔及野生麝香貓咖啡獨有風味！」想試「咖啡黃」親手冲泡出品？沙田一田百貨搞咗個「世界級貓屎咖啡品嚐班」，日期為11月20日，只要在一田CoffeeFair購買$200咖啡商品就可報名，名額有限，額滿即止！
UCCNO.1特選藍山咖啡豆$750/a
UCC咖啡中、原粒咖啡代表作！一街都話自己賣藍山咖啡，須知90%牙買家藍山咖啡出口都掌握在日本人手上，想試真風味？日本品牌無走雞。
香醇蒸餾咖啡粉$85.9/a
為二百五十年老舖AnticoCaffeGreco出品，較重口感，玩極度幼細磨研度，咖啡味尤為突出。
日本NESCAFE即溶生豆咖啡$29.9/a
今年9月最新出即溶咖啡口味，生咖啡豆溝烘焙過嘅咖啡豆，口感有啲似豆漿咖啡！
日本NESCAFE即溶果仁朱古力咖啡$23.9/a
果仁朱古力咖啡只要用熱水一撞，就會冲起半吋高厚厚泡沫！
a.一田（26941111）
b.晚記（27804388）