現年23歲嘅動漫Maggie（李曼筠），當年憑住34D身材打響名堂，不過自從越嚟越多出位模湧現後，Maggie無論人氣同聲勢都明顯下滑，為免被淘汰，Maggie的起心肝力追，近日佢簽約新經理人公司打算進軍樂壇，前晚佢就被發現同現年26歲、貌似八両金嘅樂隊N'Gine結他手Fantasy約會，兩人仲孖住拍拖買結他。
細心餵乳酪
家冇拖拍嘅Maggie喺感情上都望盡快脫離敗犬行列，雖然上月佢自爆同異性發展緊一段曖昧關係，但始終佢嘅真命天子仍未出現，前晚佢以一身粉紅短裙打扮喺尖沙嘴通利琴行會合Fantasy，之後Fantasy就即席教Maggie彈結他，唔知Maggie係唔係太投入，坐低時仲差啲春光乍洩，Maggie為感激Fantasy指導，陪佢直落嘆雞蛋仔同乳酪，仲好細心餵乳酪畀Fantasy，旁若無人大耍花槍。
對於戀情有着落，噚日Maggie接受電話訪問就強調兩人只係朋友，佢話：「自己本身學過吓結他，咁知道佢學咗十幾年結他，又係結他手同教結他，先約佢一齊睇結他，自己想多方面嘗試，想喺音樂上入手，第時自彈自唱畀大家聽吓。」