上個禮拜，維園年宵攤位拍賣，最大兼最高價魚蛋燒賣檔成交價要51萬銀，家陣做小販都唔易！過去幾年，瑞信報告嘅專欄「大衞與哥利亞」（D&G），都會就年宵攤位拍賣價對香港樓市有冇指標作用作出分析，今年都唔例外，瑞信話，今年平均年宵攤位租金按年跌9%，所以預測龍年樓市會跌。
用全部攤檔平均租金計
華華對份報告半信半疑，因為維園咁貴嘅熟食檔都有人承價，照計後市應該睇得唔差。份報告都有講，今年維園最貴嗰檔熟食檔7日租金就要51萬，係10年嚟最高，高過舊年34%，佢哋話如果10粒魚蛋賣20蚊，7日內每15秒要賣一份先維到皮。
華華打去問報告負責人、被稱為「細價股揀股王」嘅瑞信小型企業地區研究主管劉紹文，佢話熟食檔租金水平比較波動，所以用咗維園全部攤檔嘅平均租金嚟計。
咁係咪準確啲呢？睇番往績，兔年年宵攤位租金跌5%，但係兔年至今樓市升咗7%，似乎報告唔係好中噃。不過報告話，今年6月至今，樓市已經由高位回落咗4%，兔年仲有幾個月，「一年前個市旺，咁講係牛頭唔搭馬嘴，家吓就好意外地合理！」
正如劉紹文話齋，兔年仲有幾個月，準唔準好快就知！
李華華
mailto:[email protected]
