一直有傳陳自瑤（YoYo）懷有兩個月身孕，故突然閃嫁拍拖三年的王浩信（Vincent），昨日兩人在港島香格里拉酒店補擺喜酒，圈中好友胡杏兒及陳法拉等齊齊到賀。被追問老婆凸肚「現餡」，Vincent即講有味笑話：「佢上面（上圍）就凸。」試圖轉移視線。
現年28歲的王浩信上月底演舞台劇時當眾向30歲的陳自瑤（YoYo）求婚，之後連環爆出王浩信曾偷嗒模謝芷蕙（Cammi）和莊思明，幸未影響Vincent與YoYo感情，二人昨在港島香格里拉酒店補擺喜酒，筵開22席招呼親友，無綫藝人胡杏兒、陳法拉、胡定欣及苗僑偉等均有到賀。
陳法拉透露已封了大利是作賀禮，她說是首次正式在港出席飲宴，問是否吸取經驗自己搞一個？她說：「都好呀，但見到咁多傳媒已經好大壓力。」
昨午4時半，一對新人率七男七女兄弟姊妹團現身，姊妹全屬圈外人，而農夫、黃長興和羅仲謙就做兄弟。Vincent和YoYo切完蛋糕便順應記者要求連環親吻，身穿帶復古味婚紗的YoYo更戴上閃爆鑽飾。
不設防速造人
不過，一直有傳YoYo奉子成婚，上圍豐滿得似谷奶的YoYo在貼身裙下，腹部有點微隆，被追問是否雙喜臨門？Vincent搶住用有味笑話轉移視線答：「邊有，佢上面就凸。總之婚後會不設防造人啦！」YoYo則解釋是因裙太難着得靚，才不小心拱起，但兩人暫未計劃度蜜月，似是怕舟車勞動影響胎兒。
YoYo指昨日的鑽飾全由金至尊贊助：「佢哋贊助我4套鑽飾，合共8位數字，老公套禮服都係由一間新合作嘅意大利品牌公司贊助，慳咗好多。」YoYo續說奶奶在註冊當日已送贈一對重量級龍鳳鈪：「聽講係舖頭鎮店之寶，但今日冇帶嚟，因為襯唔到。」Vincent就承諾愛老婆一生一世，並會盡量將財政大權轉交老婆。問為何不邀請傳緋聞的莊思明？Vincent反應甚大：「吓？點解要請？好多同事都冇請。唔會因為咁影響心情，因為我哋恩愛到冇嘢影響到。」
莊思明照祝福
婚宴前，新郎已做足傳統婚禮儀式，朝早接新娘，Vincent自爆被姊妹團玩到差點嘔：「我哋食咗個蛋糕，裏面有wasabi、檸檬汁、榴槤同辣椒粉等，食到班兄弟差啲嘔。」
另外，莊思明最近被指搭上王浩信，她前晚出席台慶綵排時表示：「大家出去做過幾次嘢，佢冇請我飲，祝佢哋白頭到老！」思明說從沒察覺王浩信追求她，又不知王是否花弗。
採訪：文國駿
攝影：葉君海