喺英超做領隊向來難撈，唔理強隊定弱隊，只要成績唔好，做領隊嘅就要出嚟孭鑊，接大信封。但世事無絕對，今季英超打到11月中，竟然冇領隊有事，當中包括俾人死睇嘅布力般流浪主帥卻恩，同埋韋根的馬天尼斯。如果去到下月尾都冇人被叮走，就會創造歷史，本世紀首次冇英頂級球會領隊喺除夕前被炒，你都咪話唔奇！
費Sir執教25年的啟示
喺今季歐洲4大聯賽之中，意西德都有教練被炒，其中意甲仲誇張到有7個主帥被叮走，但係英超竟然仲未有，簡直百年難得一遇。而喺之前10季英超共有25個領隊喺11月中之前被炒，當中有唔少仲係名帥，例如摩連奴、荷杜同埋已故嘅卜比笠臣。但今季嚟到11月中都冇領隊中招，你話點可能唔係奇景呀！聯賽領隊聯會主席比雲就表示好歡迎英超球會唔炒領隊：「費Sir上星期喺曼聯慶祝執教25年，令其他球會醒覺到，要隊波攞到好成績同長時間有穩定演出，就唔可以隨便炒領隊。嚟得英超教嘅，都係有經驗有實力，一定可以對隊波有貢獻。」
全部頂到年尾開出4.5倍
查實英超唔係冇高危領隊，好似新特蘭嘅布魯士、保頓嘅哥尼、布力般嘅卻恩同埋韋根嘅馬天尼斯。布力般喺卻恩帶領下家陣排尾2，搞到啲球迷要透過遊行示威同掛橫額嚟迫佢落台，但球會卻唔理民意，唔郁手之餘仲有傳同佢續約㖭。史篤城主席哥迪斯分析：「布力般嘅班主為咗推卻恩上台，於是就炒咗艾拿迪斯，佢哋唔會自打嘴巴嘅。保頓花咗好多工夫先喺般尼撬走哥尼，所以唔會亂嚟。」至於韋根雖則喺聯賽8連敗兼包尾，惟主帥馬天尼斯亦偏偏仲未有事。韋根主席韋倫仲力撐馬天尼斯：「馬天尼斯嘅位置非常之穩。我尊敬佢，而且知道可以喺佢身上攞番110%嘅回報。」
如果到2011年除夕英超領隊全部冇事，就會喺本世紀首次冇英頂級聯賽領隊被叮，而外國莊家亦似乎認為冇人喺下月底前出事，將20個英超領隊全部成功捱到12月尾嘅賠率列為4.5倍。博彩公司威廉希爾嘅發言人沙柏就話：「家嘅情況就好似打獵，冇人想首先郁手，但係，一有領隊被叮，就會隨時引發骨牌效應。」
近11季英超秋天前首個離任主帥
球季：10/11
首個被炒領隊（球會/日期）：奧尼爾（阿士東維拉/8月10日）
球季：09/10
首個被炒領隊（球會/日期）：保羅赫特（樸茨茅夫/11月24日）
球季：08/09
首個被炒領隊（球會/日期）：古比士利（韋斯咸/9月3日）
球季：07/08
首個被炒領隊（球會/日期）：摩連奴（車路士/9月20日）
球季：06/07
首個被炒領隊（球會/日期）：杜維（查爾頓/11月13日）
球季：05/06
首個被炒領隊（球會/日期）：佩連（樸茨茅夫/11月25日）
球季：04/05
首個被炒領隊（球會/日期）：史杜洛（修咸頓/8月23日）
球季：03/04
首個被炒領隊（球會/日期）：荷杜（熱刺/9月21日）
球季：02/03
首個被炒領隊（球會/日期）：列特（新特蘭/10月7日）
球季：01/02
首個被炒領隊（球會/日期）：彼得泰萊（李斯特城/10月1日）
球季：00/01
首個被炒領隊（球會/日期）：維埃里（車路士/9月4日）
資料來源：英國《每日郵報》