渣打馬拉松唔單止成為香港一年一度嘅盛事，仲成為國際其中一項重要賽事。不過，渣打好似嫌一年得一件盛事未夠喉，所以想將「渣打藝趣嘉年華」都發大嚟搞。
今年係渣打銀行第四年搞「渣打藝趣嘉年華」，一連兩日喺維園舉行。渣打集團（2888）亞洲區行政總裁白承睿噚日預告，下年有機會衝出維園，將巡遊帶埋上街，希望可以搞到好似巴西里約熱內盧嘅規模咁大。
究竟係咪真係搞到咁大，華華要拭目以待，講番今年嘅嘉年華，用《愛麗絲夢遊仙境》做主題，嚟自200間學校超過3000個學生扮鬼扮馬，又有魔術表演又有巨型木偶巡遊，搞到維園充滿嘉年華氣氛。
話明用《愛麗絲夢遊仙境》做主題，唔少得愛麗絲同瘋子帽先生呢啲角色，計埋逢星期日進駐維園嘅賓賓，兩日以嚟吸引咗7萬人參加呢個嘉年華會。