倫敦大學生示威，抗議大學加學費。賓夕凡尼亞州立大學（PennState）學生示威燒車，與警察衝突，係為咗大學將84歲、執教46年嘅大學美式足球隊教練炒魷。法國學生久唔久就示威，抗議這，抗議那，究竟為何？趁與法國Ｓ一齊飲茶，於是問吓佢，法國Ｓ話：「我讀書時都上街示威，為反而反者，都唔知爭取甚麼。我在巴黎問過今日嘅示威大學生，有甚麼爭取目標，佢地好似我當年一樣，唔識答，總之為反而反，我地法國人唔鍾意贏家，永遠同情輸家，與美國人好唔同，總之年青人示威冇造成重大傷害，咪由得佢地囉，唔駛太過緊張。」
滙豐與香港警方對於極少數人仿效美國OccupyWallStreet行動，在滙豐總行樓下皇后大道中嗰邊紮營，大概亦係抱此唔駛緊張態度，並不驅趕「住客」。滙豐當年放棄地下，換取更高建築比率，故此樓下係公眾地方，只有官方先至可以清場，但警察近三年來見慣雷曼式活動，一於視若無睹，故此在滙豐樓下紮營人士，唔知幾時先至會離開。賓架Ｒ認為有礙觀瞻，影響香港作為國際金融中心形象，但富商Ｃ就與法國Ｓ持相同意見，認為無傷大雅，富商Ｃ仲親自到滙豐樓下了解，佢話嗰度有張梳化，佢坐響度見到一位阿婆，唔似係熱血反建制、反金融霸權人士噃，於是主動同阿婆傾偈，阿婆承認唔知人地反乜，總之在此紮營，冇警察趕人，佢就乘機加入。阿婆話俾富商Ｃ聽：「呢度好住㗎，一有瓦遮頭，二馬路對面有靚廁所（公廁），三香港有心人常來此贈送食物飲品，對我嚟講，呢度算係好食好住，我一於唔走嘅嘞，住得幾耐得幾耐！」
富商Ｃ對我地講：「Occupy運動有幾多人支持吖，佢地對香港冇破壞呀，大家唔駛理會，反而阻住地球轉，阻礙港珠澳大橋興建嗰班大狀，令香港納稅人唔見咗六十五億元（按：新增大橋建築費，係估計數字），先至要清佢地場！投票清走陳淑莊，我有份㗎！」佢都去投票，與蛇齋餅糉絕對無關，難怪今年區議會選舉嘅投票率上升。