王君馨一向舞藝精湛，前晚與李亞男、朱璇、陳庭欣等無綫小花為台慶環節綵排時為顯舞功，大合照時突然使出一招朝天腳搶鏡，寶刀未老的湯盈盈即晒一字馬，似向這位新一代舞后宣戰！
無綫《萬千星輝賀台慶》將於本周六晚（19日）舉行，湯盈盈、李亞男、王君馨、陳庭欣、朱璇等前晚在將軍澳電視廣播城綵排「美女舞動ChokChokChok」環節，十幾個女仔會以不同造型亮相，鬥擺出高難度甫士。
陳庭欣玩圈
大合照時王君馨出奇招搶鏡，突然在後排施展朝天腳展示五吋高踭鞋，之後又與林夏薇跳高難度BreakDance出盡風頭。其他小花見狀都不甘示弱，陳庭欣拉埋李亞男一齊玩花式呼拉圈，但動作生硬美感欠奉。
盈盈唔恨嫁
身為前輩級的湯盈盈即場示範一字馬，似向王君馨宣戰，盈盈笑說：「我一向做到一字馬，佢哋都話我寶刀未老㗎。唔覺得自己年紀大會蝕底，最緊要大家一齊玩得開心。」被追問緋聞男友錢嘉樂有沒有教授一招半式？盈盈大發嬌嗔說：「黐線，冇咁嘅嘢。」問她是否在家教玩攬攬錫錫？她即時反擊：「你哋拍拖有冇攬攬錫錫吖？」盈盈被追問婚期繼續耍太極：「我心態好後生唔心急，一切順其自然。」
攝影：陳志嵐
採訪：王崇穎