富商「鱷魚」一向係威係勢，除咗出入有保鑣傍住，佢出到嚟個態度都唔多友善，除咗成日板住一塊臉擺出個老闆款外，特別係對傳媒就更加冇面畀，邊個想埋身都殺無赦，真係好鬼得人驚，估唔到鱷魚對住工作上嘅夥伴都係照辦煮碗，唔理三七廿一都要人哋聽晒佢話，關仁聽個朋友講試過同鱷魚有生意上合作，事成後鱷魚宴請一班工作人員到「飯堂」食飯，點知成班人其實都打定底先嚟，去到飯堂見到山珍海味都食唔落，鱷魚即時黑面話佢哋唔畀面，但係班工作人員亦唔領情，仲一句回敬話：「我哋嚟係做嘢，唔係食嘢。」
原來成班工作人員都係外國人，佢哋根本唔知鱷魚喺香港咁架勢，其實鱷魚要靠佢哋嘅知識，最後都死忍唔發作。
撰文：關仁